環境
1
2
有兩張鐵板燒枱，估唔到午市都已經坐滿另一張枱！餐牌
13
13
可以揀Omakase或者午市精選，我哋就揀咗後者。
午市精選𝟸人前套餐 $𝟷𝟸𝟾𝟶/𝟸人
沙律．前菜 
是日沙律、前菜為粟米凍湯配荔枝漬蕃茄及鐵板蒸蛋。粟米凍湯帶粒粒粟米粒，雖然係凍湯，但味道都好濃郁，清涼口感好清新。鐵板蒸蛋比平時所用嘅時間耐啲，川同平時食嘅好唔同，蛋漿新鮮煮起，口感十分順滑，蛋味濃之餘感覺好creamy(無加奶都creamy），配上紫蘇花、龍蝦汁，難怪成日話最簡單嘅食材先係最難煮得好食！
季節燒魚 
季節燒魚為金邊魚，師傅先炸魚鱗，再煎香魚肉，大玩fusion配酸菜魚汁，炸魚鱗好香口，沾上酸菜魚汁好似小食咁，至於魚肉亦好鮮嫩。
南非鮑魚 
生南非鮑魚即席係面前處理，冇加任何調味，本身嘅鹹味就係來自海水鹽味，彈牙帶海鮮味，沾上伴碟嘅鮑魚湯醬鮮味更濃。
沙巴虎蝦 
沙巴虎蝦大大隻，同樣即席係面前處理，蝦頭會用嚟煲湯再比客人享用。即切即燒，肉質爽脆、蝦味鮮甜，配上紅椒汁更惹味。蝦頭麵豉湯蝦味超濃郁，鮮得來不鹹。
鵝肝 
鵝肝配搭蘋果醋，將油膩感頓時減低，食完鵝肝再食冰菠蘿，令口腔即刻清新。
美國牛肉 
主食方面有3款牛肉可選，我哋要美國牛肉，師傅亦會問你想要薄切定厚切，我哋揀咗厚切，五成熟，碟邊有新鮮山葵(芥末)及鹽漬昆布。假如覺得唔夠鹹嘅就可以同鹽漬昆布一齊食，比起平時淨係灑鹽上去嚟得有誠意。牛肉肉質飽滿且帶肉汁，口感juicy，我鍾意同新鮮山葵一齊食，一啲都唔攻鼻，反而更突出肉鮮。
炒飯•炒野菜•味噌汁•甜品 
至於日式傳統炒飯無用油，而係加沙律醬◉‿◉ ，我係一個勁鍾意沙律醬嘅人，所以本身勁驚，但估唔到將沙律醬撈勻喺飯裏面炒，令飯香氣更盛，食落去仲覺得飯帶滑身，一啲都唔乾，係屋企都可以試下（笑）
食埋炒野菜之後就到甜品，可選雪糕或咖啡，是日雪糕係開心果味，我哋揀雪糕，師傅再會烘麵包加上白砂糖，變成脆焦糖面，食落去口感好似蝴蝶酥，襯雪糕食好正。
