我哋叫咗個黃咖喱雞、炭燒豬頸肉同蒜蓉包。所有食物都係熱辣辣上枱，個鑊氣同熱度，一食就知係即叫即整，唔係一早煮定擺喺度翻熱，熱辣辣真係好食。
首先講個黃咖喱雞，真係好出色。個咖喱汁好香濃，椰奶同香料味平衡得好好，辣度係溫和而持續嗰種，唔會搶喉，但令人一路食一路想飲多啖汁。用個汁嚟撈飯，真係想食多碗白飯。雞肉份量都多，而且冇骨同埋唔係d雞碎，係一件件幾嫩滑嘅雞髀肉。
炭燒豬頸肉燒得啱啱好，邊位有少少焦香，入口好香口，咬落去有嚼勁但唔會韌，好惹味。
蒜蓉包亦比想像中大份，有成六件，烘得金黃香脆，蒜蓉同牛油味都好足料，點咖喱汁食簡直係絕配。
埋單計返，兩個人食到好飽飽，人均都係二百零蚊。以今時今日嘅物價，呢個價錢仲可以食到即叫即做、份量十足嘅食物，性價比真係無得輸，出面連鎖餐廳絕對食唔到呢種質素。今次體驗幾滿意，已經約定朋友下次再嚟試埋其他餸菜。
