嵐橋丼飯專門店 (已結業)

尖沙咀棉登徑一路都雲集好多特色餐廳，尤其是每次經過嵐橋丼飯專門店都會比佢吸引到，今次終於有機會試一試啦！餐牌非常清晰，所有丼飯有咩材料都show哂岀黎，一目瞭然！一落完單，跟餐嘅味噌湯就好快擺左係我地面前，味道唔會太咸，好開胃。鐘意拖羅嘅我當然唔執輸，叫左極上呑拿魚腩丼，成個飯嘅擺盤好有心思，尤其是扮鳥巢嘅鵪鶉蛋，食慾馬上大增，大拖羅有5塊，唔好以份量好小，實際上每塊都十分肥美，一咬落口拖羅嘅油香即刻必哂岀黎，超正。朋友叫左一個極上海之幸丼，材料超級豐富，鮑魚十分爽口彈牙，牡丹蝦十分鮮甜，連蝦頭都啜乾淨，池魚好新鮮，完全唔腥，松葉蟹鉗蟹味十足，最後海膽處理得相當好，唔會有怪味。我地仲叫左佢地嘅招牌關東煮，有野菜油豆腐同山芋魚肉餅，兩種材料都煮到入哂味，油豆腐仍然保持到濃郁嘅豆味，魚肉餅亦都好有口感，激讚