饞。台式食堂 (如心廣場二期) (已結業)

如心廣場最近越開越多食肆，好多都係中下價位嘅餐廳，今次就試咗呢間台式餐廳，餐廳環境裝修簡潔，食物款式選擇多，都好有台式風味！餐牌主要都係套餐，叫咗鹽酥雞配滷肉飯(另加$10)，同埋鳳梨蝦球，兩樣都會跟飯同埋開胃菜，開胃菜係木魚碎四季豆。鹽酥雞，即叫即炸，鹹鹹香香，熱辣辣，好香口！一碟份量都好多，數埋應該有20件雞件。不過套餐唔包飲品，食食吓有啲乾。鳳梨蝦球同樣大碟，面頭加咗沙律醬，份外惹味！不過略嫌蝦球唔夠脆身，扣左少少分。至於滷肉飯，如果調味方面再咸少少就直情係台灣食到嘅正宗滷肉飯！整體來講，食物份量大，不過套餐$80唔包嘢飲就偏貴少少，抵讚嘅係餐廳唔使+1！