煌府婚宴專門店 (已結業)

今日同屋企人搵地方食午飯，由於有兩個小朋友， 我哋要搵一間容易泊車、仲要唔好咁迫人嘅地方。 十二點幾差唔多一點去到寶石大廈，好彩仲搵到位泊車，仲好快有枱可以坐低 。酒樓好好，安排咗我哋坐享單邊嘅大枱，坐唔定嘅小朋友可以喺旁邊行嚟行去，同埋有位放bb車。 酒樓職員仲好快咁主動搵咗兩張bb櫈畀我哋。 我哋叫咗好多嘢食， 包括乾炒牛河、蝦餃、 燒賣 、叉燒包、 牛肉球、煎蘿蔔糕 、鳳爪排骨蒸飯、叉燒腸 、蝦腸、 牛肉腸、 蘿蔔絲酥餅 、叉燒酥，埋單都只係3、4百蚊，好抵食。