眾人前後腳到，於是先嗌咗個4人餐等住先，之後散嗌。
三鮮酸辣湯酸味比重蓋過辣味，料倒係足。
四喜烤麩味清甜幾好，但同我喺第啲上海舖食嘅味完全無異，所以唔肯定呢啲係咪現成嘢。鎮江肴肉色澤有啲暗啞，唔得粉嫩，還好試咗一舊又冇怪味。
鎮江小排骨陳醋似乎下太多，酸味過咗火位，肉亦太硬，有待改善。跟餐飯量是太多，4碗可分拆8碗。
百葉小棠菜似家常便餸，清清哋好齋感，反而襟食。
蔥爆牛肉調味唔錯，京蔥確實夠多，牛就少咗。
跟住散嗌如下：
皮包肉種類（排名分😋）：
1. 窩貼（燙口、有肉汁、煎底脆）
2. 小籠包（有肉汁）
3. 生煎包（席間有人話好食，但本人覺得啲肉有啲鬆散）
4. 紅油抄手（微辣、但冇落醋、冇甜䜴油味、蒜味不足、冇爆紅油淋落去，調味不完整）
間間都整水煮魚酸菜魚，你估間間都煮得好食？呢間示範咗出嚟。一般酸菜魚係用鯇魚或生魚，佢居然用龍脷柳（撻沙、鯰魚），係就係冇骨，但全冇魚香味、肉浮、鬆散，辣度係大辣，每食一啖都得小心，因每一啖都嗆喉，並缺少了「麻」，完全冇花椒味，一味死辣冇層次。之後嗌左杯豆漿（低糖），飲哂成杯諗住沖走但都仲係有啲辣油卡喺喉嚨頂（吊鐘）位置，唔係辣爽一身汗，係忸怩嘅辣。奉勸佢不如取消呢道菜好過。
乾煸四季豆炒得幾夠鑊氣，小辣，豆甜。
以食物質素，喺屋邨，佢中上，比市區，係某些食物有待改進。（同行人話下午茶質素仲好食過晚市）
*寫呢篇嘢時剛好遇着聽晚起禁晚6點後堂食，似乎又要蟄伏起嚟。
