新泰東南亞餐廳 (已結業)

喺港島區返工，如果想食泰國菜，要走去九龍城實在太遠了。最近喺灣仔發現呢間泰國野，見價錢都ok （咁緊係無九龍城咁平民化），入去試下。原來成間餐廳都幾大間，座位好闊。所有侍應都係泰國姐姐。睇左餐牌有好典型常常食既泰菜，又有好多少見又新穎既菜式，例如鴨肉生菜包，本身想試呢個，但係最後叫得太多野，要放棄呢個。我地叫左泰式生蝦，蟹肉炒粉絲，芒果糯米飯，麵包咖哩軟殼蟹，蛹蝦。生蝦新鮮爽口，個醬好夠酸夠辣，越食越開胃，五隻真係唔係幾夠喉，不過唔食得辣既人要飲多兩杯冰水，因為真係幾辣😆食咖哩一定要配麵包，咖喱汁超多，個麵包底吸曬啲汁好入味，不過麵包有少少唔夠脆。軟殼蟹炸得香脆，香口野又係食唔停，如果再多幾隻蟹腳就好啦。蛹蝦，無喺泰國餐廳食過呢款菜，我都唔知佢係咪泰國野，不過唔理啦，好食就得啦。類似食蛋散咁，入面包住隻蝦。食落卜卜脆。甜品緊係芒果糯米飯啦，有紫米同糯米，芒果超甜。仲叫左個蟹肉炒粉絲，加埋一total 五舊水，都唔算貴，坐得又舒服，服務都幾好，如果喺灣仔銅鑼灣一帶諗唔到食乜食下泰國菜都幾好。下次要記得試鴨肉生菜包