CR² By Cupping Room (雅蘭中心) (已結業)

旺角雅蘭中心一向都係成日會經過嘅地方，因為近朗豪坊。嗰度有間cafe叫CR²，地方唔係好大但係經常坐滿人，今日有機會終於試到佢哋嘅食品。飲品order咗CR² Ice Mocha 同埋Peach Espresso Fizz。杯mocha就好香濃，甜度同濃度都分配得好好，令人有不斷想飲嘅感覺。蜜桃氣泡咖啡濃郁嘅咖啡夾雜住蜜桃嘅甜味及酸味，而且咖啡中有汽，個感覺好特別好神奇，對我嚟講第一次飲係一個好好嘅體驗。另外叫咗一個牛油果花生醬雞肉飛碟，呢個值得推介因為估唔到花生醬配雞肉可以咁夾，中間又有牛油果，最緊要個飛碟又烘得超香脆，咬落去有唔同嘅層次同質感。仲order咗一個伯爵茶玫瑰蛋糕，個蛋糕絕對係打卡之選，因為整得好靚，入邊有淡淡嘅伯爵茶味配埋表面嘅玫瑰cream，絕對做到甜而不膩。提提大家，CR² 其實係Cupping Room旗下嘅新cafe，所以佢哋嘅甜品係 Bakery La Vina嘅出品，大家如果想食西班牙嘅甜品，唔一定要去中環咁遠呀，旺角都可以，而且佢哋大受歡迎嘅cheesecake依度同樣可以食到，下次我一定會試埋個cheesecake。