小神燈新派飯館 (已結業)

自問好鍾意食中菜，今次到訪將軍澳嘅小神燈，餐廳以懷舊風為主調，裝修獨特，有大排檔風味，超級適合打卡，食物方面主打多款新派粵式料理，晚市需要排隊等候，深受大家歡迎👏🏻糯米炒膏蟹新鮮滾熱辣，上枱時香氣四溢，炸炸聲咁，糯米飯生炒再將膏蟹焗熱，飯粒飽滿，乾身，帶飯焦，加埋鮮甜美味嘅蟹膏同蟹肉，唔覺唔覺就清曬😍 奇趣脆皮豬手賣相一流，原隻豬手上，皮脆肉嫩，口感豐富，仲有兩款醬汁幫助解膩，性價比高，兩款都係必點嘅菜式☺️腿茸菜膽雞肉質鮮嫩，雞有半隻份量，味道唔算好濃郁，反而食得出雞肉嘅原汁原味，旁邊有少量蔬菜，感覺更加健康😛 菠蘿咕嚕肉好有驚喜，外皮掛滿酸甜醬汁，咬落外脆內軟，雙重滋味令人回味無窮呀～ 紅湯鮮茄浸青蔬同樣出色，簡單材料混合而成嘅一碟健康菜式，湯底清甜，鮮茄味好出，蔬菜新鮮，配埋少量雜菇開胃又好味道👅 最後以楊枝甘露作結，果然真材實料，裏面竟然有一絲絲芒果，濃稠度亦比出面厲害，出色過甜品店👌🏻