鬼滷 (已結業)

打冷好多時都會有種大排檔嘅麻甩感覺，坐喺一間靚裝、玩味濃、好似酒吧咁嘅環境入面食潮州嘢，其實真係有少少違和感，但不失為同朋友黎chill下嘅好選擇，唔洗下下都食西餐日本野咁悶。蘭王蛋蠔餅炸到脆一脆個樣勁吸引，除咗有大量大大粒嘅蠔仔之外，真係明顯食到蘭王蛋香濃嘅蛋香。 好鍾意個蠔餅炸得好透，超級酥脆香口，食到有幸福嘅感覺。滷水拼盤連埋香料上就知滷水落咗心機，咸淡得宜有香味。 鵝片、墨魚同豬腩肉都好嫩滑入味，尤其鐘意豬腩肉好透薄軟滑，好似食緊好幼滑個種蒜泥白肉咁，點埋秘製辣醬好正。椒鹽普寧豆腐外脆內嫩，脆皮好薄，食到山水豆腐嘅香濃。 重點當然係醬汁有大量韭菜好香，鹹鹹地清清淡淡已經好好味。蠔仔粥同平時食到嘅好唔同，蠔仔粥好嫩滑僅僅熟，調味比較清淡，主要靠菜莆嘅鹹香。 蔥同芫荽都係另上，對於平時略嫌蠔仔粥太多芫荽嘅我黎講啱晒。