All day set menu有前菜、燒物、主菜同甜品。
可以揀2/3/4 course，相當有彈性，價錢分別係$168/228/288。
食泰國菜一定會點燒豬頸肉，呢度用上西班牙栗飼豬，肉質比一般更嫩滑少少爽口，邊位燒得微燶帶點香脆，中間仍然有肉汁
雞肉燒得夠香，沙嗲醬花生味濃好惹味。
主菜揀咗要加$28嘅龍蝦汁蟹肉伊麵。伊麵煮得剛好仍然彈牙，蟹肉份量都唔少，每條麵都沾滿鮮味龍蝦汁
和牛面頰以真空慢煮到腍身，牛肉味濃有豐富骨膠原。薯仔同樣炆得好腍好入味，瑪莎文咖喱微辣惹味，送飯一流
甜品揀咗餐廳最出名嘅流心牛角包，係泰式奶茶味
牛角包賣相靚，睇得出好酥脆。一切開就流晒啲奶茶出嚟，牛角包表面酥皮脆身，底下索滿濃郁奶茶，果然好好味
椰子雪糕溝埋底下煙韌糯米，感覺似食緊椰汁紫米露。仲有椰果同風乾鳳梨，令口感更加豐富。
跟餐$25配特飲，不過青檸梳打就唔包要收正價。白桃芝味特飲表面係芝士奶蓋，芝士味濃度適中唔會搶咗白桃果汁味，表面灑上玫瑰花，飲嘅時候聞到好香玫瑰花味
總括嚟講食物有水準，比起正宗泰國菜多一份特色，鍾意食泰菜嘅不妨一試。
