上海知味小館 (已結業)

見佢新開張冇耐，又心思思想食上海嘢，就去買個外賣試一試。星期日十二點左右去到，入到佢見到都坐滿。可以講話冇咩花錢裝修嘅一間小店，唔緊要啦，最緊要啲嘢好食啫，加上我外賣就更加唔理佢入面係點啦。店員好有禮貌，雖然忙都即刻同我落單先👍我叫左擔擔麵、豬扒菜飯、肉燥面同小籠包。可能係小店關係，等左二十分鐘左右先有得攞。價錢差不多二佰蚊。味道一般，可以講話有少少失望，而家外賣好少唔分湯上，返到屋企啲面都軟哂啦。另外叫左兩杯珍珠奶茶，老婆同個仔飲左一淡就唔飲，我忍唔住都試一試，估唔到係港式奶茶加珍珠，唔怪之得飲一淡就頂唔順。