Home A Day (已搬遷) 新店位置

星期日去上環永安shopping，斜對面有一間好優雅嘅餐廳Home A Day ，座位舒適，格調優雅，就入去試吓啲下午茶。 我哋喜歡食清淡嘅食物，所以叫了芝士青蘋果紅桑子田園沙律，菜同蘋果紅桑子都好新鮮加咗蜜糖、油和醋，酸酸甜甜清新可口，係健康人士嘅首選。另外要了一客素三文治，三文治麵包十分軟熟，麵包上面鋪咗香滑的牛油果，配了自家製造的乳酪醬，味道一流，火箭菜、車厘茄嘅味道好夾，而且食落去係好新鮮嘅，三文治的顏色鮮艷，紅紅綠綠，味道清新，女士們一定鍾意。友人有點餓，所以叫咗一個荷香蒜蓉大蝦球蒸珍珠米，這飯都好有驚喜。飯好有蒜蓉味，而甜豉油配珍珠飯令人食不停口，大蝦球亦十分鮮甜，喺不錯嘅選擇。火龍果荔枝特飲唔會好甜，有淡淡嘅茶味荔枝味，還有幾粒火龍果和薄荷葉加以點綴，真係色香味俱全。士多啤梨鮮奶沙冰特飲嘅顏色是粉紅色好吸引，味道酸酸咪咪，奶味濃郁，友人十分滿意。下次再encore。