十里洋場 (已搬遷) 新店位置

係OpenRice網頁見到十里洋場呢間新開嘅食肆，今日行開銅鑼灣順便試一試，果然唔錯值得推介！店舖位於利園二期，交通方便，我同朋友無訂枱都有位，但如果訂咗枱就有卡位坐，舒服好多，因為入面啲二人枱好close! 茶位18元位，店內環境裝修幾靚，仲播懷舊歌！我哋order咗女兒紅醉雞，件件都係雞肉仲浸透女兒紅酒香味，盛載著雞嘅碗送上枱時仲係冰凍，個碗都好特別！今次主要嚟試呢個脆煎灌湯小籠包，果然好味，蒸小籠包經常食，脆煎就第一次試，好脆好香，好似食鍋貼嘅感覺，但鍋貼就無灌湯係裏面，所以好正😍！上海粗炒就太甜啦，落咗好多糖，唔明點解要落咁多糖，油亦太多！甜品本來想揀梳乎厘，因為寫明要製作20分鐘，所以揀咗木桶豆腐花，等咗好耐都未到，問問侍應生，原來豆腐花亦都係即叫即製，所以都要等20幾分鐘，後來木桶豆腐花上枱時，一打開原來係黑豆製造，真係有驚喜，紅糖另上，載紅糖嘅器皿都好靚，黑豆營養價值高，用嚟整豆腐花更加好食，好特別👍🏻👍🏻👍🏻，如果唔想等太耐，可以早些落單！聽侍應生講呢度晚飯時段仲有人唱歌，叫我哋預先訂枱會好啲，今次午餐消費四百元正！