小王牛肉麵 (已結業)

今日早左少少番到元朗，7點前番到又喺形點嘅站落車，無理由唔入商場繼續試新野嘅！今日心血來潮想食台式野，於是去左小王牛肉麵。平日嘅7點前到當然係唔洗等位直入。呢間台式餐廳都幾多款式，睇到我眼都花，選擇困難症又發作喇！最後兩個人每人叫左三樣野食，肉鬆皮蛋豆腐、半筋半肉牛肉麵以及台式肉燥鹽酥雞扒飯。肉鬆皮蛋豆腐有大量嘅肉鬆，遮住晒皮蛋同埋豆腐。呢一味一定要撈埋一齊食先好食，要將佢變成一pat野咁先為之正，每一啖都要有齊皮蛋、肉鬆同埋豆腐先得。呢味簡單野當然輕鬆過關，味道亦都唔錯。再嚟半筋半肉牛肉麵都算係幾多餸，唔洗搵嚟搵去先見到。湯底都幾濃不過又唔會過鹹，麵唔會太淋，係台式野嘅味道，牛腩同埋牛筋都好淋，唔錯。至於台式肉燥鹽酥雞扒飯都幾台式bor。通常台式野嘅雞扒都幾大塊，而且佢擺得幾整齊，望落賣相都唔錯啊。雞扒唔會炸得好乾，又唔會太鹹配埋肉燥飯好台式。呢度上菜都算快，比起元朗另一間出名嘅台式麵亦都坐得舒服d，得閒轉下口味試下新野都幾奶，有競爭先有進步嘛！