影片
更多
2022-01-23
872 浏览
唔知大家鍾唔鍾意食蛋嘅料理？我自己好鍾意食玉子燒、日式嘅生蛋撈飯、梳乎厘班戟，如果你都鍾意食啲幾樣就啱晒，呢間餐廳有晒呢幾樣野，之前都經過好多次 今次終於有機會試吓。Tamago-EN係一間日式雞蛋料理專門店，係新加坡嘅品牌，喺2019年12月登陸香港旺角第一間分店，店舖主打日式雞蛋料理，雞蛋都係用日本沖繩農場直送嘅新鮮雞打，雞蛋料理好似有班尼迪蛋All Day Breakfast、生雞蛋拌飯、玉子燒、沙律、三文治、蛋包飯、梳乎厘班戟等，全部都係以雞蛋入饌，及各種食材，創出唔同又多元化嘅口味。沖繩嘅農場雞，都係用米、海苔、艾草等具營養價值既飼料餵飼，成分天然無激素，雞蛋都係生咗之後第二日就會送去香港，夠新鮮。雞蛋日本經過三重品質、安全檢驗，都係經過嚴格UV殺菌工序，確保食材達至最高既食品安全標準，殺菌嘅同時保留營養。而且雞蛋夠新鮮，生食係冇問題，有獨有嘅鮮橙色蛋黃，蛋香特別濃郁。餐廳連裝修都係以蛋做主題，以黃色同白色為主調，吊燈都係雞蛋，非常可愛。嗰日係星期日嘅下午茶時間，所以人唔算多，北角分店喺商場入邊，最入邊嘅櫈仲會有大玻璃，陽光充足。餐廳有75分鐘用餐時間，每人要最少叫一樣嘢。睇
Tamago-EN係一間日式雞蛋料理專門店，係新加坡嘅品牌，喺2019年12月登陸香港旺角第一間分店，店舖主打日式雞蛋料理，雞蛋都係用日本沖繩農場直送嘅新鮮雞打，雞蛋料理好似有班尼迪蛋All Day Breakfast、生雞蛋拌飯、玉子燒、沙律、三文治、蛋包飯、梳乎厘班戟等，全部都係以雞蛋入饌，及各種食材，創出唔同又多元化嘅口味。
沖繩嘅農場雞，都係用米、海苔、艾草等具營養價值既飼料餵飼，成分天然無激素，雞蛋都係生咗之後第二日就會送去香港，夠新鮮。雞蛋日本經過三重品質、安全檢驗，都係經過嚴格UV殺菌工序，確保食材達至最高既食品安全標準，殺菌嘅同時保留營養。而且雞蛋夠新鮮，生食係冇問題，有獨有嘅鮮橙色蛋黃，蛋香特別濃郁。
餐廳連裝修都係以蛋做主題，以黃色同白色為主調，吊燈都係雞蛋，非常可愛。嗰日係星期日嘅下午茶時間，所以人唔算多，北角分店喺商場入邊，最入邊嘅櫈仲會有大玻璃，陽光充足。
餐廳有75分鐘用餐時間，每人要最少叫一樣嘢。
睇過Menu，第一頁係佢哋嘅招牌生雞蛋拌飯，之後就係全日早餐、沙律、三文治、玉子燒，主食方面有親子丼同埋蛋包飯，仲有意粉同埋漢堡，最後就係甜品嘅梳乎厘班戟同埋唔同飲品。
-
1️⃣ 終極TKG生雞蛋拌飯 +碎金槍魚腩 💰65（👅: 7.5/10）
呢個係店舖嘅招牌生雞蛋拌飯，因為怕太單調所以就加咗碎金槍魚腩，另外仲可以加牛油果、醃三文魚等配料。呢度嘅生雞蛋拌飯唔同之處，係佢會將蛋白打成泡，再放上生蛋黃，蛋白打成好蓬鬆嘅泡沫，就好似軟綿綿嘅白雲係啲飯上面。
店員話唔好成個撈勻咁樣食，應該每啖都匀蛋白或者蛋黃加飯，另外仲有另上嘅醬油同埋飯素可以落。
蛋白入口好有空氣感，食落去其實冇咩味道，不過本身平時食生蛋嘅蛋白都係冇味，因為店舖都係用日本雞蛋，蛋黃顏色幾深，而蛋黃食落去味道都足夠，有蛋香味，不過蛋黃份量對比起個飯唔足以撈晒成個飯，所以個飯要夠味要加埋醬油同埋飯素，傳統嘅生雞蛋拌飯係有醬油不過無飯素，飯素味道太重唔建議落晒成碟，不過兩者都可以豐富碗飯嘅味道。碎金槍魚腩份量比較少，所以食落去魚嘅味道同埋油脂味都唔突出。
-
2️⃣ Tamago-EN特製5款玉子燒串 💰78（👅: 7.5/10）
呢個係佢哋嘅招牌玉子燒，有五款口味，分別係蟹肉、鱈魚子沙律、親子三文魚、海藻醬、番茄仔。玉子燒入口算濕潤，不過我覺得可以再juicy啲，蛋唔會太老，算嫩滑，食落去甜甜地，可以明顯見到有一層層。松葉蟹肉玉子燒既蟹肉份量唔多，蟹嘅味道唔算好突出，我覺得如果佢喺蟹膏會更好。最多配料嘅應該係親子三文魚，沙律個味道應該係最重，海藻醬食落鹹鹹地，蕃茄就比較普通，不過如果玉子燒入面都有配料或者醬汁會更好。
-
3️⃣ 芝士明太子筷子捲 💰38（👅: 8/10）
因為好鍾意芝士明太子，所以叫多一串筷子捲，筷子捲係一種香港比較少見既日本料理，係關西嘅節慶食物，材料方面其實同大阪燒差唔多，分別只係將塊薄既麵糊捲係筷子上，再加上一隻煎蛋。上面隻煎蛋煎得好好，入口滑溜，麵糊味道濃郁，個味真係好似食緊大阪燒，因為佢即醬汁喺大阪燒汁，再加上香辣嘅明太子，入邊有好多芝士，芝士味道濃郁，仲會有少少拉絲，係幾唔錯嘅小食。
-
4️⃣ 燉牛肉蛋包飯 💰118（👅: 7.5/10）
呢個蛋包飯外表非常吸引，因為佢隻蛋整到成個旋風形狀，因為隻蛋真係覆蓋成個飯，所以唔係蛋蓋飯。隻蛋入口都算嫩滑，食落都有蛋味，不過同玉子燒一樣都係唔夠juicy，如果多啲蛋汁會更好，同埋隻蛋唔算厚身。牛肉係一粒粒，份量唔算好多，不過入口夠腍，肉質唔算好滑亦都唔算好鞋。個醬汁係洋蔥汁，食落去甜甜地，送飯一流，不過個飯就比較硬身一啲。
-
5️⃣ 沖繩黑糖咖啡班㦸 💰88（👅: 8/10）
餐廳呢排有期間限定嘅沖繩黑糖系列甜品期間限定，分別有沖繩黑糖咖啡班㦸、 沖繩黑糖珍珠抹茶奶凍、沖繩黑糖雜莓乳酪、 沖繩黑糖薄脆拿鐵，我就叫咗頭兩款，甜品用嘅黑糖都係日本沖繩直送，夠健康又好食，因為黑糖係沖繩人長壽嘅秘密，沖繩黑糖係用甘蔗原汁熬煮而成，有豐富嘅礦物質同營養，而且仲散發獨有嘅炭燒香味。第一款一定係呢度嘅班㦸，係即叫即整，不過我預先叫咗後上，差唔多食晒個時甜品就嚟到，有兩大塊班㦸，會聞到蛋香味，夠脹卜卜。
班㦸咬落去鬆軟，有少少空氣感，不過唔會好似食緊空氣，帶小小實在，如果更濕潤會更好，食落蛋香味都算突出，可能因為都係用沖繩嘅雞蛋。上邊同碟都淋上咗黑糖漿，有黑糖味但唔會太重，整體唔會好甜，所以冇蓋過蛋香味，不過我朋友就覺得太甜，所以我覺得黑糖漿可以比客人自己落份量最好。
而咖啡忌廉我覺得咖啡味道好突出，如果同班㦸一齊食會蓋過佢嘅味道，加上我唔係特別鍾意咖啡，呢個cream食得多會覺得漏。雲呢拿雪糕食落正常，可以同班㦸一齊食，令到佢更加濕潤。黑糖蕨餅咬落去夠腍帶煙韌，有黑糖味但唔會太甜。
-
6️⃣ 沖繩黑糖珍珠抹茶奶凍 💰48（👅: 7.5/10）
另外就叫咗個抹茶奶凍，上面鋪滿左沖繩黑糖珍珠，食落去黑糖嘅炭香味突出，同抹茶都算夾，不過奶凍嘅抹茶食落去僱粉一啲，Cream會令到佢滑身一啲。-
黑糖珍珠鮮奶 💰38（👅: 7/10）
呢個黑糖鮮奶冇得揀甜度，飲落去我覺得有啲甜，而珍珠係比較腍，如果再煙韌啲會更好。-
🍹 櫻花草莓鮮奶 💰38（👅: 7.5/10）
草莓鮮奶個顏色非常之靚，飲落去相對冇咁甜，比較清新，有少少櫻花香味。-
🌟整體來講，如果你好鍾意食蛋嘅話可以一試，食物方面我覺得甜品比主菜更出色，玉子燒同蛋我鍾意比較Juicy一啲，不過可以睇得出餐廳運用蛋喺唔同嘅菜式。餐廳勝在分店都算多，店員服務都幾好，會解釋嘢食嘅食法，下次嚟可能會主攻甜品，而且下午茶價錢幾抵食
-
👅味道: 7.5/10
🍴環境: 7.5/10
💰消費: $100-200人均 (服務費: 10%)
张贴
