金滿膳燒味餐室 (已結業)

我個老婆大人真係好好，平安夜嘅晏晝同朋友食咗餐意大利菜慶祝，食慣好嘢嘅佢話晚餐食平啲就得喇！大家話喱啲老婆去邊道搵吖！我哋嗰日要去觀塘買嘢所以就喺附近搵吃。行過牛頭角道見到喱間金滿膳燒味餐室，見到掛喺道隻燒鵝幾正咁一於就同老婆大人嘆佬餐啦。喱間餐室除咗有燒味之外原來仲有串燒食嗰喎！不過串燒要九點幾十點先有得食！咁唔使煩叫個燒味二人套餐兩舊水都唔使好抵食，鬼咁口渴嗌咗嘢飲先！老婆大人加三蚊雞要咗凍檸茶走甜我就例牌飲熱奶茶，兩個茶底味道都唔錯表現正常。套餐每人都會有一碗例水青紅蘿蔔湯，又幾鬼足料飲落都幾好味起碼唔會淡茂茂先！鍾意食燒味喱個餐就真係啱晒喇，本身有一個例牌乳豬可惜嗰日太好生意賣晒！所以我哋轉咗做叉燒，另外仲有個細嘅雙拼例牌我哋揀咗燒鵝同油雞。                              最重要係有碟白灼菜心，咁鬼多燒味全部都肉騰騰有碟菜即刻健康晒！菜心夠淋夠甜加啲蠔油食好呀。先試左個例牌叉燒老婆大人鍾意食半肥瘦我梗係就佢啦！喱個叉燒口感又幾盞鬼喎淋得嚟又有啲爽口，調味啱啱好唔會好似出面啲叉燒咁一味死甜唔錯唔錯。我哋好好彩豉油雞得到隻雞髀，所以食落去啲肉係滑嘟嘟嘅。