滿樂中菜 (已結業)

朋友聚會，今次約左喺一個好有文化氣息嘅地方 — 戲曲中心入面嘅【滿樂中菜】。 平時網上見到好多人喺戲曲中心呢度影靚相兼打卡，自己第一次嚟，又真係好靚喎，隨手攞起部電話影，都已經好靚。滿樂中菜由門口開始至到內裏佈置，特別大氣！ 用左綠色嘅櫈，同白色背景都幾配合。 茶係採用有機中國茶，碧螺春、杭州胎菊等等，都頗有特式。 蜜汁叉燒排列整齊，肥瘦適中，爽口。 唔會見到有過多嘅肥肉，但咬落去就FEEL到油脂豐富。 伴有黃豆粒，煮得好入味，我地全部爭住食。鴛鴦胡椒焗蝦係餐廳嘅十大名菜之一，用青胡椒串、白胡椒粒同黃酒炒完再去焗中蝦，食起嚟唔會太辣，只有啖啖嘅胡椒芳香，香味撲鼻。 不過只有四隻，略嫌唔多夠喉！ 鮮蟹肉燴黃金豆磚黃金磚入面黃黃地色，似係玉子豆腐咁。 豆腐上面有啲紫菜，最頂層佈滿蟹肉，係一梳梳嘅鮮蟹肉呀。 整舊放入口，清淡得嚟又好有蟹嘅鮮味，男女老少都好啱食。豉汁蒸金錢鱔看似簡單嘅一道菜，餸飯真係一流！ 鱔片切得幾厚身，而且好新鮮，咬落去勁彈牙，豆豉亦都特別多，好濃味。其實嘢食唔貴，環境好，服務佳，係個唔錯嘅選擇。