肚餓了串燒烤焗專門店 (已結業)

亞士厘道呢幢大廈越來越多日本餐廳，之前同朋友黎食飯既時候見到呢間餐廳人多到要𨋢口等位，相信有佢既過人之處，想同朋友飲下酒傾下計，呢間會係唔錯既選擇。以串燒來說，呢間餐廳選擇好多，菜單亦將食物分門別類，一目了然。《玉子燒 （芝士蟹籽）》蟹籽份量真係多到嚇親！無諗過芝士同蟹籽可以佈滿每一件玉子，玉子口感較綿，食兩件已經幾飽！《金黃醬燒廣島蠔》原隻帶殻既廣島蠔上有一層沙律醬調味，但仍唔會蓋過蠔既鮮味。《火辣黃金薯條》越食越辣，超惹味！本來熱辣辣既時候帶軟身質感，唔覺好辣，但凍左之後發現更好食，薯條變得更脆而辣味突出，最啱一邊食一邊飲酒！《黃金炸魚皮》魚皮無想像中咁重咸旦味，一黎到既時候只係微暖，但質感夠香脆。《鹽燒厚切牛舌》超誇張！我未食過咁厚咁大件既牛舌，本來覺得價錢有點兒偏高，但見到件件都咁大咀厚之後，突然又覺得物超所值！《棉花糖多士》呢個組合真係無得輸！棉花糖密鋪多士表面，上面仲加上朱古力醬，甜度剛剛好，多士又夠香脆～《蒜蓉燒原條茄子》誇張的燒茄子，比我既手掌大差不多一倍！茄子上放有滿滿的蒜蓉，令茄子變得非常惹味《香燒餃子雞翼》雞翼漲卜卜，中間有明太子，好香口