六丸(居食屋)日本料理 (已結業)

難得今日放寬晚市堂食，所以同我朋友仔喺旺角睇完戲之後，就近近哋，試下呢間日本餐廳。 餐廳環境都唔錯，服務員姐姐態度好熱情。 我哋叫咗岩石燒雞粒鍋飯、地獄黑豚肉拉麵、凍檸茶、同埋蜜桃梳打水。見佢個紫薯甘栗餅幾吸引，所以就叫埋做小食。 落咗order冇幾耐，啲嘢食好快就到。岩石照燒雞粒鍋飯好有驚喜。嚟嘅時候溫泉蛋震下震下，令人視覺上食慾大增。而且佢啲雞粒係唐揚炸雞塊，食落口甜甜地，雞皮炸得外脆內軟，雞肉好嫩，成個飯都好足料，真係大件夾抵食，好滿足呀！ 至於地獄黑豚肉拉麵，就啱曬鍾意食辣嘅朋友仔啦！佢嘅湯底係有少少麻辣，而且湯既面頭有啲辣椒油，完之後舌頭嘅麻辣感覺持續咗一段時間，令人愈食愈上癮呀。 蜜桃梳打水同凍檸茶都ok㗎！又凍又夠氣，夏天飲好消暑呀！ 配埋地獄黑豚肉拉麵就啱啱好！至於小食紫薯甘栗餅，真係令人食過返尋味，炸到外脆內鬆化，咬落口粉粉地、甜甜地 ，而且又食到紫薯嘅粒粒。呢個配搭認真唔錯，十分推薦！ 總括嚟講，呢間餐廳啲嘢分量又足、價錢又抵，性價比好高呀！行開旺角又想食日本嘢嘅朋友，都可以試下呢間餐廳。