吉壽日本料理 (已結業)

難得今晚兩公婆撐枱腳，就揀咗之前同朋友食過質素唔錯嘅吉壽放題。今次再去幫襯，餐廳已經裝修左，相比之前擺放飲品，小食、甜品既位置,而家變得方便企理好多。食放題有限時間，事不宜遲一坐低就即刻點嘢食！ 印象中上次啲食物出得比較慢。估唔到落單不久就有食物上枱。一個字快！第一轉我哋叫咗少少壽司，刺身，海膽手卷同埋串燒，刺身整體唔錯有冰放盆底保持溫度新鮮！ 壽司上面件刺身係厚切，飯就細細舊，食多幾件都唔怕啲飯頂住個胃。海膽手卷雖然細細卷，但海膽好鮮甜，當然如果海膽再多啲就更加好！串燒燒得好香， 燒蝦肉質爽甜， 牛舌煙韌可口！記得之前食過芝麻雞翼，皮脆肉嫩非常香口，今次一定要再試，好彩水準依然保持！其他小食都唔錯！食完第一轉我地再加單， 加單落咗一陣，食物同第一轉一樣都係好快就到，仲要落嘅所有單都算嚟得齊，今次再返嚟幫襯整體水準都保持到！