Burger Factory (已結業)

難得放假，通常都鍾意係屋企附近四圍行四圍去發掘一下有冇啲新嘅餐廳小食，而呢間漢堡包點應該開業唔夠一星期，當然就去試下啦。餐牌方面都有多種漢堡選擇，有牛、雞、魚、素漢堡等等都算多選擇。即叫即整，全程都可以睇到佢整漢堡嘅過程。紅酒燴牛臉珠漢堡套餐漢堡包雖然即叫即整但都唔會等好耐，上到枱嗰陣其實見到個漢堡包都好大份，牛臉肉好有牛味但根位可以再淋多少少，內裡就加咗炒洋蔥同沙律菜，令食果陣唔會油膩。而薯條方面就轉咗蕃薯條，味道甜哋幾香口。整體套餐都算大份，成個套餐食咗九成已經飽哂。