越老仔 (已結業)

喺西九龍中心呢個舖位其實之前都轉手過好多次，不過大概一年之前就開咗呢間屬於銀杏館嘅越南菜，個名都改得幾貼切，叫越老仔，因為佢係社企，對於香港人嚟講始終會有啲情意結，所以今日都想幫襯吓。

喺疫情期間，外賣自取照價有七折，如果七折咗之後價錢就合理好多。

諗咗一陣，最後都係決定要個簡簡單單嘅香茅雞扒湯河，七折後承惠$35。湯同河粉係分開上，所以仍然能夠保持食物質素，雞扒份量都多，不過我就略嫌肉質唔夠滑同埋比較乾身，好似都放咗一段時間咁。而湯底就好夠熱，所以加落河粉之後一齊食溫度啱啱好。

香茅雞扒湯河

$35

食物就普普通通啦，不過都係果句，話晒都係社企，仲好支持銀髮族再就業，所以都好值得支持嘅！