肥仔黎 (已結業)

今日咁啱5點幾沿Yoho行過去千色嗰頭，路經肥仔黎附近時家人突然諗起上次買唔到，咁既然喺附近，又唔啱就到6點，即管快速行過去睇下。去到雖然已經有大約10個人排緊，但店員確認仲有雞，咁我地就要咗半隻雞，一份雞胸，一份蔬菜，全部BB辣 (但食落家人都覺得辣)，另加一個大鹵肉飯及一個細米粉。鹽水雞肉質算係夠嫩滑，雞及配菜大致上都算入味，尤其係蘿蔔，魚片，菠蘿等。而份量方面，無論半隻雞，一份雞胸及蔬菜份量都算足夠。如果係小家庭，提議可以叫半隻雞，加飯或米粉，再加一份蔬菜，應該已經好夠食。備註：我地大約5:45pm排隊，6:15pm (即等咗大約半小時) 輪到落order及俾錢。由於落order後要等大約25分鐘，我地去完買其他嘢，先再返轉頭攞，大家都可以考慮呢個安排。