撈喜 (已結業)

曾經在新加坡過新年，食過華人流行的應節食品叫「撈起」; 今晚行過東大街竟然發現一間新開張嘅「撈喜」，不過唔係主打新加坡嘢，而係食花膠撈麵。同行友人即時比花膠兩個字吸引，嚷著想試， 因為花膠含豐富骨膠原。係女士思物。但最衰同佢剛剛食完嘢, 但係見佢咁想試, 即管入去睇下有無糖水之類可以食。間嘢地方唔算大, 放左六七張枱, 有個開放式的廚房。坐低打開menu，只見到有兩款糖水，椰子肉蓮子燉花膠同埋棗王蓮子燉花膠。因為天氣太熱，二話不說， order 曬兩款凍食。仲見到有黑牛，想order埋，不過原來新張期間未能供應, 所以只叫了罐Coke zero 頂礶住先。講番兩款糖水，佢果款棗王蓮子燉花膠，佢幾滿意，花膠算腍滑，蓮子都去左芯，棗去埋核，入面原來仲有雪耳。味道都幾清甜，幾順喉。我果款椰子肉蓮子燉花膠，椰子肉性溫，係補陽火，可以強身健體。蓮子都係左芯，我果塊花膠都幾大舊，不過椰子好鬼硬，我真係咬唔落。我覺得糖水味道甜度剛剛好。今次好滿足，下次至再來試佢招牌花膠撈麵。