金寶小廚 (已結業)

金寶小廚主打家庭式小菜，是典型大角嘴區內的街坊食肆，店外貼有公告指堅持不加味精。店舖地方細細，食物選擇出奇多，午巿蒸飯系列梅菜鯇魚、肉餅及蒜蓉豆豉排骨最搶手。今日有運行，搶到最後一碟蒸排骨。見到蒸排骨上枱，即時笑不攏嘴，因為它以不鏽鋼執碼碟盛載，風格跟自己在家煮食一模一樣，差點以為回到家。排骨給斬成一口骨的大小，極方便食用，肥瘦適中有肉味，部份帶爽骨，肉身沒有黏附多餘生粉。看得見碟底的汁頭屬清澈級別，並非酒樓常見的混濁漿糊版，用以撈飯時，完全沒有丁點增肥罪惡感。排骨汁的出色，全靠豆豉及蒜蓉配合。出街食飯從不對豆豉有期望，食過的絕大部份都是無豆味、硬身，金寶小廚的卻有豆香，拍得住自己食開的東莞豆豉，加上蒜蓉份量足，大大提升排骨汁的鮮香。更精彩是豆卜混排骨同蒸，得以盡收味道精華，入口後肉汁自豆卜澎湃湧出，醬爆感超爽。邊食蒸飯，邊聽到廚師開動猛火進行快炒，心裡在想好有鑊氣喔，決定加多碟星洲炒米。炒米大大碟、賣相靚、鑊氣勁、香噴噴兼料多，有蝦、蛋絲、中國芹菜、洋蔥、叉燒、椰菜、紅蘿蔔及芽菜，嚴重豐富。蛋皮經煎香後切絲，洋蔥炒至全熟呈金黃色，都是看得出的花心機製作；蝦以碎身入饌，無損整碟米粉的色