泉章居 (已結業)

食店搬新鋪之後新不如舊呢個定律係咪真係無得改變呢?? 今次泉章居又幫我印證左...話說老闆某位好友生日, 諗左一輪都唔知食咩好... 幾條友行行下去到旺角睇相機, 之後就決定去泉章居. 7點鐘居然重有檯, 坐低左就見得張套餐紙, 連menu都唔用, 諗住散叫D呀姐又好似唔係好like, 算!!!叫左個4人餐, 霸王雞半隻, 梅菜扣肉, 炸大腸, 梅菜鯇魚, 再加黑椒骨, 鹽焗雞同椒鹽珍肝, 4個人男人, 差唔多啦... 結果, 失望既一餐... 霸王雞同鹽焗雞, 有D o鞋口, 明顯地煮得太耐, 而且得個咸字... 梅菜扣肉, 不如叫梅菜瘦肉算啦, 成碟扣肉得一塊類似五花腩, 其餘塊塊都係似瘦肉多D, 梅菜得個甜字, 一D咸味都無... 炸大腸非常之行貨... 梅菜鯇魚D梅菜唔夠, 魚又腥... 黑椒骨不提也吧, 一個字- 差... 椒鹽珍肝又係得個咸字...好怕D食店出左名, 之後搬新鋪... 古有妹記魚粥, 鑽石山詠黎園等, 今有泉章居... 唔好以為出左名, 新鋪裝修好左, 質素就可以交行貨; 新客或者食唔出, 舊客比你欺騙得一兩次就唔會中計...