茶薈 (已結業)

星期日去睇老友狗狗前黎搵食,見呢到唔駛等又好似坐得ok舒服,就試下啦~一打開餐牌就覺得有d唔對路,首先個餐廳名己經夠古靈精怪,食物更係又中又日又茶餐又東南亞總之不中不西不倫不類咁,仲有d好花巧既名,個人其實幾抗拒呢類餐廳,樣樣有既結果通常都係冇樣精. 叫左兩個lunch set,我要了木瓜凯撒沙律,男友要了吉列豬扒米線,兩個都包一杯玫瑰薰衣草茶,我同男友都最怕花茶,情願飲檸茶好過. 男友驚唔夠食又口痕叫左個wasabi海鮮naan.木瓜沙律估唔到係將木瓜切半上,裏面放左少量凯撒沙律,結果係本瓜還本瓜(仲要自己起肉),沙律還沙律,兼夾係好咸同好少菜既沙律添. 米線男友話ok,冇乜特別係幾大碗囉,感覺係西餐廰價錢($48)食緊茶餐廳既食物.個所謂既naan等左好耐先黎,我仲以為係用印度naan做底,原來係圓型個樣似pizza,食落個底似葱油餅面頭舖左海鮮(梗係雪藏啦) 芝士仲有d幾駭人綠色既wasabi汁,講真,賣相都幾核突. 味道雖然不至於難食,但都係o個句,搞咁多花臣做乜呢,唔係九唔搭八既野擺埋就叫fusion架~服務都算唔錯,有個男仔都幾醒目,一眼關七斟水埋單自動自覺唔駛勞氣,算係咁