喜惶點心專門店 (已改名) 查看

我好鍾意飲茶食點心，不過自從二人限桌令實施後，已經甚少甚少嘆到一盅兩件😭，因為去飲茶，始終都係成班人去先開心，大家飲啖茶食個包，六個人搶四粒蝦餃，或者四個人分三個雪山叉燒包，呢啲先至係飲茶嘅樂趣。既然暫時唔去茶樓，唯有幫襯點心專門店，旺角嘅喜惶自稱牛肉世家，啱哂號稱牛魔王嘅在下😌。首先揀咗牛肉三寶：粟米煎牛餅，乾蒸牛肉燒賣皇同香滑免治牛肉腸粉，當中最特別同最好食嘅係煎牛餅，又薄又脆嘅外層好香口，味道有啲似粟米片，入面嘅免治牛肉同粟米配搭得宜，點埋喼汁食，好滋味😋；乾蒸牛肉大大粒，面頭鋪滿蟹子，入面除咗牛肉之外，芫茜嘅份量都唔少，茜友應該幾滿足；不過牛腸就失色少少，腸粉皮太厚，影響口感同食味。相比之下，牛肉以外嘅點心水準就較一般，懷舊紙包骨肉質肥美但偏油膩；海苔香煎蘿蔔糕質感較削，蘿蔔味差啲啲；酥皮焗叉燒包正常水準；紫薯鬆糕偏甜，紫薯味唔太自然，鬆糕亦略嫌唔夠軟綿。唉，真係好想好想好想好想去飲茶食點心😐…...