Bistro La Bon (已結業)

今日約咗朋友喺觀塘既Bistro La Bon食西餐，餐廳環境雅緻，座位舒適寬敞，好岩情侶、朋友一邊享受美食，一邊嘆靚酒傾計。我地分別點左一份 set dinner，包括沙律、頭盤、湯、主菜同甜品。沙律係松葉蟹肉海草沙律，蔬菜清新，鮮味滿分，蟹肉香口，酸埋胡麻汁更加開胃。輕煎日本帶子，醬油漬三文魚魚子配自家製香草醬，帶子好香口，三文魚子喺口腔中爆發，味道鮮甜。特別推薦檸檬牛油汁焗智利黑鱈魚配青蘋果莎莎，魚肉軟滑，口感非常好，而牛油汁同青蘋果簡直係天作之合，唔會遮蓋魚本身嘅鮮味之餘，更有畫龍點睛之效。青蘋果酸甜爽口，配埋魚肉好有火花。呢個價錢黎講，性價比非常高。而燒美國頂級牛柳都相當唔錯，燒汁香濃，牛柳份量十足，大大份。牛肉軟稔，肉味重。去到甜品環節🍮今日嘅甜品係布甸，為今餐畫上完美句號。呢度有Happy Monday / Wednesday優惠， 18:00後Main Course買一送一，我哋已經準備下次再嚟食！