出爐 (已結業)

出爐係一間食燒味嘅小店，位於將軍澳好出名嘅黃色 food court 日日食入面，幫襯當日本來想試另一間黃店老點嘅 “三權分立 缺一不可” 套餐（即係蝦餃燒賣叉燒包各一件），可惜佢冇開 / 未開，於是就疊埋心水食燒味。叫咗個雙拼飯：叉燒皇拼脆皮燒腩仔，兩者以燒腩仔水準較高，皮夠脆，肉質肥瘦尚算分明，好食👍；相對之下，叉燒就較為失色，雖然味道正常，但係非常瘦，瘦到甚至咬起上嚟感覺頗硬，少啲牙力都出事😂。值得一讚嘅係，叉燒同燒腩仔份量都幾多，食哂啲飯，仲剩番唔少餸慢慢𡁻。另外想講下呢個場，原先以為係普通 food court，只不過全部商戶咁啱都係黃店，點知上到去，成個場都有 Mee 懲罰計劃嘅宣傳品，仲有個易拉架寫住食嘢請你睇蘋果日報，確實黃到金，睇嚟仲勁過葵廣😆。其實喺豪宅樓下有個領展格局嘅街市同 food court，淨係呢下都已經夠哂勁啦🤗。