醉胡爐 (已搬遷) 新店位置

今日同朋友嚟到尖沙咀食飯，想搵返間好坐又好食嘅高質餐廳，所以就嚟到醉胡爐。呢到嘅打邊爐冇令到我失望，湯底好高質，中意食海鮮嘅一定要叫卜卜蜆鮮蟹魚湯鍋，坊間比較少見，裡面有好多蜆肉，炒香咗海鮮加酒嚟炒香，加埋啲湯一齊打邊爐。就係因為湯底有幾款海鮮，湯底先會咁鮮甜，我自己都忍唔住飲返幾啖湯，用嚟打邊爐就啱晒啦！食肉獸當然要叫牛肉拼盤啦，我哋點咗份細嘅胡爐牛拼盤，都夠晒兩個人份量去食。拼盤裡面有好幾種肉，牛舌心、安格斯手切肥牛、手切肥牛、牛胸爽、霜降牛粒。除咗肥牛雪花均勻重牛肉味之外，特別推薦牛胸爽，平時比較少機會見到，好多人誤以為白色一塊係牛嘅脂肪，其實佢係牛胸前肋骨中間的軟骨部位，食落十分爽口！ 我幾中意佢哋嘅韮菜餃，大大粒好抵食，口感綿軟，有韭菜特殊的香氣，中意食韭菜嘅一定要食。另外手打蝦滑係必食嘅，口感爽滑Q彈，食落更彈牙，飽滿夠晒大粒。如果想搵一間同朋友靜靜哋傾計同食飯嘅餐廳嘅話，呢到都幾啱食㗎！中意食海鮮一定要叫卜卜蜆鮮蟹魚湯鍋！包你食完覺得鮮甜。