Noodies (已結業)

平時食開西環出名一間台灣嘢食，今次試吓去對面一間食麵叫Noodies，去到兩點幾滿座坐滿晒人好好生意，見Openrice個個都寫佢哋嘅麵條有幾好味，心諗車仔麵＄46都算貴喎，不過見佢話個湯冇味精就不妨試吓啦！係等緊麵嚟嘅時候望下啲餐牌，又差唔多兩點半可以叫埋下午茶，我哋就叫多個豬手同春卷。豬手賣相非常吸引食落仲啖啖肉，炆得好淋好入味，＄29四件好味又抵食。仲有個春卷炸到脆卜卜裏面又熱辣辣絕對好味過其他茶樓，＄22四件值得一試。大約等左15分鐘我碗手撕雞拼雞翼湯烏冬終於到啦，其實有啲失望以為係稻庭烏冬，不過食落又幾好味嘅，個湯就真係足料冇味精飲晒都冇話好口渴，特別欣賞個手撕雞肉質冇話鞋颯颯又夠入味，係個雞翼比較普通咗啲，等我下次試過另一款餸先。西環第三街另一新食點！