南香雞飯

此食肆主打星馬美食，我相信元朗區內冇乜類似嘅食店，而且仲係良心小店，不過座位比較迫，同埋太多人食就等得比較耐，唔太適合活潑好動小朋友或年邁嘅食客。

招牌海南雞飯，望望雞皮同雞肉之間嘅透明啫喱，就知道皮爽肉嫩，配埋辣醬同黑豉油，再加油飯，整碟飯都非常香濃。

招牌喇沙，呢一份比較失望，椰香味唔夠重，米粉完全唔索味，非常奇怪。

印度薄餅，新鮮滾熱辣，配上咖哩汁，香脆可口，餅身唔會好厚，值得一試。

鮮油咖央多配斑蘭，多士夠脆但唔夠熱，斑蘭味唔算太突出。

整體質素唔差，下次會試埋其餘咖哩飯，因為望到其他食客食得幾滋味，賣相亦唔錯。