生隆餅家 (已搬遷) 新店位置

深水埗一帶始終都係比較懷舊老店、香港地道特色食物，今日因為要去深水埗買嘢就都驚咗呢一間傳統糕點舖生隆餅家。 下午時分亦有好多街坊喺度排隊，相信係呢區嘅地道美食。舖面非常之懷舊傳統，黃色招牌紅色嘅舖名，掛起一張張紅色嘅紙條列出售賣嘅糕點，有砵仔糕、白糖糕、黃糖糕、馬蹄糕、黑芝麻糕、黑芝麻卷、紅豆糕，亦都有唔同款嘅月餅，單黃/雙黃、白蓮蓉/黃蓮蓉。我就買咗白糖糕同埋黑芝麻糕試食。細個一向都好鍾意食白糖糕，但係我印象中嘅白糖糕一直都係少少酸酸地嘅。見到網友非常之推介生隆餅家嘅白糖糕，一試之後覺得口感非常鬆軟，而且有別於平時嗰啲，原來發酵得好嘅白糖糕係唔會酸酸地嘅。 至於黑芝麻糕，買到返屋企，打開膠袋亦傳出香濃嘅芝麻味。食落口唔單只質感唔錯亦都有香濃嘅芝麻味。非常推介呢一間懷舊糕點譜，希望香港一路都可以保存到呢種地道特色味道，下次經過再試吓其他糕點。