大都烤鴨 (已結業)

上次我表妹返黎香港話想食片皮鴨但係無食到，今次返黎就一行四件走左去尖沙咀揾片皮鴨食。呢間我之前無食過，不過有人介紹話唔錯，所以特來一試。四個人叫左半隻鴨 (本來想叫一隻，但係又想試下其他野), 一客小籠包，一個上湯雜菌小棠菜，一個鴨鬆 什麼包 (唔記得咗個名), 一個黃金豆腐。一坐低就有少少生果喺張枱。唔好睇小呢一小碟生果，佢係每位收費的，仲要唔平。不過除此之外，其他野都好好。片皮鴨個皮都幾脆，肉唔會太“孩”。啲皮(即攞黎包鴨嗰塊)好細心咁用紙隔開，唔會幾塊黏埋一齊。配菜有平時嘅青瓜，蔥，仲有蜜瓜同似蘋果嘅野，幾特別。鴨鬆包就好似生菜包但係用左挖空左嘅饅頭代替。鴨鬆炒得入味。好味。小籠包超好食。皮好薄，湯好多，入面豬肉味好濃。正。最後 Encore 左一籠。上湯小棠菜正常。個黃金豆腐原來唔係用鹹蛋黃煮嘅，其實係炸豆腐。炸得不錯，而內裡嘅豆腐好滑。其實都好味嘅，不過我哋問個侍應點解無鹹蛋 (因為餐牌英文係寫 salty egg)，佢問左廚房原來無用鹹蛋好耐而又無改餐牌，最後佢幫我地取消左。