Tonkotsu 8 by 三田製麵所 (已結業)

一直都好鍾意三田製麵所嘅沾麵，佢旗下主打搏多豚骨拉麵嘅Tonkotsu 8最近喺太古城新開咗分店。位置喺新裝修嘅Apita food court。除咗豚骨拉麵，仲有名古屋撈麵、咖喱飯同鐵板炒飯，選擇都算多。撈麵同飯都包括味噌湯，另外可以加錢加配小食同飲品。名古屋香辣炸雞撈麵賣相好靚有辣肉碎、生蛋黃、香蔥、韮菜、粟米同紫菜，麵條幾彈牙，少少辣好惹味唔會太重口味。配埋三田好拿手嘅唐揚炸雞，炸雞炸得酥脆唔油膩，內裡肉質嫩滑有肉汁。一次過食到撈麵加炸雞夠晒滿足鐵板牛肉炒飯用鐵板上枱，保持溫度之餘仲有飯焦。牛肉份量都唔少，味道似炒飯版牛丼總括嚟講食物質素幾好，人均約一百蚊價錢合理。