好運泰國美食 (已搬遷) 新店位置

我向老婆大人提議黎呢間小店食晚飯，先旨聲明環境一般，估唔到佢肯食，仲大讚添！呢度店面細細，環境麻麻，不過服務幾殷勤。價錢唔貴，簡直可以用相宜去形容。泰式海南雞飯（$42）可惜油飯賣晒，要食白飯（碟上）；雞肉份量唔多，好嫩滑，點個泰式醬簡直係精髓所在添！香茅雞中翼湯金邊粉（$35），轉冬陰功湯底（另加$10）就係呢碗湯河令老婆大人對呢度刮目相看喇！湯底酸酸辣辣（叫左小辣，辣度還可以），金邊粉夠幼容易索湯，炸雞翼香脆入味！值得推介！泰式炒椰菜苗（$50）再整碟炒菜！睇黎我下次屋企唔煮飯，就要黎呢度買外賣了，哈哈。