一杯屋 (已結業)

由於8月餐廳週食開有癮，激發我要將銅鑼灣、尖沙咀區稍有名氣或有4分以上嘅餐廳食勻，目標係整一堆西日食店排行榜，涵蓋壽司、拉麵、鐵板燒、燒肉、爐端燒、法國菜、西班牙菜等。就係咁我响8/19第一次踏進一杯屋。嗰次因為言語誤會我叫咗1.5人前嘅極上牛舌定食，飽到反艇，但就好想再去。早幾個星期去到想食嘅極上牛舌售罄，今次終於食到！汲取經驗，今次要咗1人前。厚切牛舌每件外皮都上咗醬汁燒得略焦，中間仍是粉紅，咬落肉質嫩口細緻，總共有12件，如果再焦多兩分外皮脆啲就完美。清爽沙律、伴碟略酸嘅醃菜响連續食咁多件肥牛舌盡情發揮咗減低滯膩感嘅作用。附上嘅牛肋骨湯飲落滿載牛味、日本蔥清香。滑孱孱嘅生淮山蓉拌勻鵪鶉蛋，加少許醬油，口感非人人接受，但絕對係我喜愛嘅質感。餐廳好大方咁劈咗一個角落做自助水吧，有齊凍熱咖啡茶，檸檬片橙汁，牛奶乳酸等，咖啡是自己動手即磨，非常香滑。就算冇食哂啲飯，1人前都係飽到反艇的﹏😵