Amusement Eatery (已結業)

香港好少地方可以食南美菜，估唔到原來長沙灣有一間，於是約咗個朋友一齊去試。餐廳有好多特別嘅前菜，我哋先叫咗個Lengua Eacabeche牛舌做前菜，有蝦餅、蘿蔔、秋葵，牛舌啲汁有少少酸，非常開胃，亦可以點辣醬，份外惹味。牛舌夠彈牙，而且好多塊，由於冇烤過，肉質比平日食到嘅牛舌柔軟。再嚟叫咗芝士番茄沙律，用咗水牛芝士同蕃茄仔，加上黑醋同香草。烤過嘅水牛芝士更加香口，配合蕃茄仔同黑醋，減低油膩感。傳統秘魯檸檬漬魚生，有洋蔥、紅椒、青椒調味，配上粟米，酸酸地辣辣地，魚肉肉質彈牙。澳洲M7和牛扒，配上熱辣辣嘅烤蔬菜。牛扒牛味重，燒到邊位帶少少焦香。Plato Criollo，其實係南美style烤飯，配有味道清新嘅青蕃茄醬撈飯，仲有太陽蛋、牛油果、烤牛肉、烤雞、紅豆、甚至烤蕉做配菜。撈埋一齊食，無論口感定係味道都非常特別，各種配菜分開食都好出色，尤其係燒雞都唔會太乾。最後甜品叫咗粟米芝士蛋糕配日本雪糕新地。芝士蛋糕入面有粟米粒，食落去味道清新有層次，唔會單調得一種甜味。雪糕新地係柚子牛奶雪糕，中和到芝士蛋糕嘅甜膩，質地有啲似雪葩，上面仲灑咗啲脆脆同加咗脆笛酥一齊食，帶出唔同口感。飲品方面，