大瀛喜日本料理 (已結業)

旺角想食放題，search最近地鐵站嘅係大瀛喜，午市都抵食。上到去先知原來平日下午都好多人，基本上full晒，好彩我地兩個人，等咗一陣就有位。自助區有沙律、蝦同其他熟食都好豐富，飲品都有好多選擇，汽水、啤酒、花茶都有，仲有熱飲維他奶同即沖咖啡，當然唔少得清酒啦。其他食物用QR code落單好方便，上菜速度好快，基本上落單後10分鐘內都陸續上齊。刺身好新鮮，尤其三文魚同吞拿魚，仲有其他地方好少見到嘅螺，爽口得來有咬口。蝦亦都有幾款，選擇好多，正！熟食方面，估唔到可以係度食到高質量酸菜魚，魚片片得薄身又爽滑，有豆芽同萵筍墊底，加上酸酸辣辣嘅味道，令我十分驚喜。仲有一份魚片浸時蔬都有魚片+豆苗，唔食得辣嘅朋友可以食呢樣，清淡得來係有鮮甜味。黑椒一口牛都好好味，牛肉淋身又入味。仲有熟食帶子，鮮甜有蒜蓉味，推薦！炸天婦羅就唔係用一般天婦羅炸漿做，所以食來更加似炸蝦，會有少少乾身不過少啲油，健康食法。食完正餐再食埋個甜品雪糕，巧滿足。