順德漁鮮酒家 (已結業)

兩個人叫左三餸一湯，好多？又真係好似幾多，只怪順德漁鮮提供左唔少選擇。例湯無乜特別，所以試下叫個芫茜魚骨豆付湯。奶白色既湯，豐富既魚味加上恰當既芫茜味，我一口氣飲左好幾碗。最好係呢個湯連湯渣既味道都唔錯，唔計較賣相既話，皮蛋、魚骨同豆腐都足以做到一碟餸。我地剩係完成呢個湯都已經飽得七七八八了。煎藕餅可能食慣左自家製一大塊既蓮藕，反而覺得依間既煎藕餅有 D 特別，一粒粒既蓮藕粒釀入一大塊魚肉。不過點整都好，今次既藕餅好脆好香口。魽魚應該讀「金」定係「鉗」？間間都有唔同讀法既？不過唔好理，最緊要好食。呢度既魽魚煎得表皮香脆可口，但係入面就嫩滑依然。入口雖然無鹹水魚咁重味道，但係淡淡然既清新感覺其實都令人一再回味。蒸白鱔可能係較失色的一味，鱔圈本身好瘦，每圈都只係得大概兩張 SD card 咁上下既大小，不過味道其實都唔錯，豉汁味能夠混入鱔圈之中，而且肉質有彈性。整體黎講係唔錯既一餐，不過同一般中式餐館一樣，呢間酒家好嘈！