跟足社交平台教路，我專登早殺到去（12:40咋！），點知門口已經變咗小型墟市，外賣同堂食嘅人龍好到呢。我好似玩緊食雞版《魷魚遊戲》咁衝入去攞飛，抬頭一望水牌寫「45號」，手心攤開張飛——12號？1至45號輪住叫，然之後重新再叫，即係話我前面有成40枱客！結果我行個圈返嚟，先叫到27號⋯⋯後尾連飛仔都派清光，認真誇張。
好在打工仔lunch time有限時，半個鐘後前面啲人急速消失，我終於成功入侵！打開餐牌選擇唔算花多眼亂，主打豉油雞、口水雞、花雕醉雞三劍俠，配飯或淮山麵，可以加錢燉湯或糖心蛋。仲有款Shake Shake芥蘭，但凍食唔太啱我呢個熱食黨。
同朋友分別點咗豉油雞淮山麵同口水雞淮山麵，實戰報告：豉油雞大獲全勝！雞肉滑溜兼入味到骨子裡，豉油香掛滿每絲雞肉；反而口水雞個麻醬落得太重手，辣味失蹤，食落有啲似「麻醬拌雞」，唔夠過癮。
加$50嘅燉湯反而有驚喜！雖然味道未算濃到黏嘴唇，但勝在冇味精攻擊，湯料塞到滿滿，飲完成個胃暖笠笠，性價比合格有餘～
17
46
