Waffle Corner (葵涌廣場) (已結業)

去葵廣最開心就係唔洗焗住食一種菜式，可以邊行邊掃街，每樣野都食少少，啱晒為食但又唔想洗咁多錢去餐廳食既我地嘻嘻。掃街最開心就係可以食埋甜品，要知道出去餐廳食唔係到到有甜品架，對於我呢啲甜品當正餐既人真係最幸福既一餐。二樓同三樓都有好多好野食，而二樓呢度就有痴住兩間都甜品既舖仔，一間係Waffle一間係梳乎里。掙扎左好耐食咩好，最好真係揀唔到決定食晒兩樣！今日真係好開心！Waffle揀左藍苺士多啤梨，配朱古力雪糕。窩夫有兩大塊，一邊吱左好多Cream，放左啲新鮮藍苺同士多啤梨係上面，另一邊放左拳頭咁大既雪糕球。窩夫烘得好脆，配生果忌簾同雪糕其實係冇得輸既配搭，都唔洗多講，下次可以既話要試試個招牌棉花糖Waffle，應該更加特別。