拳王泰國餐廳 (已結業)

今次黎到呢間泰國餐廳同朋友飯聚，呢間泰國餐廳幾特別，聽個名就知，係一間拳擊主題餐廳。餐廳裝修都係同拳擊有關，枱面印有餐廳招牌-拳王公仔，椅子似個重量級沙包，餐廳入面仲放左好幾條拳賽冠軍嘅金腰帶，連電視播緊嘅都係拳擊賽，睇到我地好緊張！我地叫左餐廳招牌菜-海南雞（半隻），送上黎嘅時候店員會倒湯落海南雞度，好特別嘅食法，海南雞有兩種醬汁同咸菜點配黎食，鮮黃雞皮脆得黎唔肥，雞肉大部份已經去骨，食落幾嫩滑鮮美。泰式蝦餅一向係我至愛，呢間嘅泰式蝦餅即叫即炸，口感酥脆，啖啖蝦肉，蝦味鮮濃，點d泰式辣醬，一啖一個，超級好食。泰式沙嗲串燒，我地叫左雞肉同豬肉， 串燒配上濃郁嘅泰式沙嗲醬，越食越惹味，令人回味無窮。原隻泰式菠蘿炒飯，有青口、魷魚仔、元貝等海鮮，配上豬肉鬆、腰果等多款配料入炒飯，菠蘿肉切粒，菠蘿香味融入炒飯，味道誘人。