德記潮州菜館

营业中

休息中

西環唔收加一的舖唔少，呢間算最騎呢，甫坐下即被餐牌寫的「招呼不周，未敢加一」弄得哭笑不得。先來是一碗熱水，用來替杯碟洗白白，是一貫潮州菜的好招呼，然後叫了蝦棗併麥魚餅及糯米炸大腸，又估唔到可以在西環吃到特色小炒與潮菜的crossover。望望遠處放著一堆鹹菜，就問阿姐點解無鹹菜，佢見偶這檯得兩丁友就無推出來，偶堅持食潮州菜無呢味唔得，阿姐笑著話無錯無錯，一碟鹹菜然後在單上劃了隻龜，原來道理這樣簡單，又說這味鹹菜，好鬼甜，用來送粥吃唔錯，若多返少少鹹味會更好。蝦棗併麥魚餅是招牌菜，傳媒來到一定介紹呢味，某傳媒報道這裡的蝦棗是傳統爽身彈牙的炸蝦丸，是傳統沒錯，不過就不是所說的爽身彈牙，蝦肉打成肉醬加埋馬蹄，微微糊口，加埋用芋粉開漿來炸的墨魚餅，夠香夠質感，配埋甜桔汁，一流。至於個炸大腸，留著一層薄薄的肥膏，炸得夠香夠脆，可惜糯米飯是蒸的，濕得很亦唔夠香，出到來效果一般。兩道又油又炸的菜，是好香口，但吃多兩件已吃不消，還是乖乖的吃碗潮州粥送鹹菜去也，剩下的由同事包底。兩人吃百二蚊，唔收加一，偶最後放下十皮作tips，阿姐話唔洗咁多啦，然後笑呵呵的開單去，西環果然是個怪地方。