HeSheEat (綠楊坊) (已結業)

依間望落似Cafe嘅西餐廳，主打沙律，漢堡包，意粉，牛角包同埋甜品。全部賣相都好靚，價錢又唔貴，好多人都嚟拍影相打卡👍想食蔬菜可以試吓呢度嘅沙律，我就試咗個牛油果蟹肉凱撒沙律，牛油果同埋蟹肉都好足料，好脆嘅麵包加埋佢嗰個甜甜酸酸嘅汁，作為前菜好開胃。芝士汁虎蝦鮮蛋意大利粉，呢個意大利粉食落似天使面又似蛋麵，淰淰地咁口感幾特別。芝士汁好重忌廉味同埋蛋味，撈埋雜菌配搭得幾好。虎蝦都好新鮮彈牙！牛油果碎蛋煙三文魚牛角包，好豐富嘅牛油果加上煙三文魚，味道好清新。牛角包有豐富嘅牛油味，夾住咁多餡料食牛角包非常滿足。飲品試左士多啤梨奶昔，上面支咗好多忌廉，唔一定要溝埋落去飲埋。奶昔同士多啤梨味都好香濃，好似食緊士多啤梨雪糕咁。嚟到呢度一定要試吓佢哋自己設計嘅甜品，我試咗個焦糖蘋果脆皮撻，上面係雲呢拿雪糕，中間係有甜有酸嘅蘋果蓉，最底下係一個脆批。總括嚟講雖然食咗好多嘢但係每一樣野都好清新開胃，食完到最後都唔會覺得飽飽濟濟。味道上亦都非常有新鮮感，可以試到出邊冇嘅西菜式。