麵屋 元祖達摩 (已結業)

呢排天氣太熱，媽咪話唔想煮飯，咁我今日又放假，就提議不如出去食啦，同細佬傾下又發現自己拉麵癮發作，細佬話太和新開左間拉麵就決定食呢間啦~我地可能都算早，7點3左右去到都唔算full,有一邊係bar檯，但因為比較近門口，所以揀左坐入面嘅四人檯。一坐低先睇下食咩先，有四款選擇，得四款我都有選擇困難症。最後圈紙嗰時比我見到期間限定係海老拉麵，我二話不說就揀左佢~ 另外揀左普通硬度，濃湯，蔥，蒜，荀都要。一上其實個賣相都好吸引，勁多櫻花蝦，當然要先試個湯頭，好濃郁嘅蝦味，細佬話就好似飲緊龍蝦湯咁。另外有兩款肉，鹿兒島五花腩同西班牙豬上肩，個人鐘意五花腩，肉味較濃同埋有少少肥肉比例岩岩好~另外仲叫左客豚肉餃子，其實我地爭啲都唔記得左，到差唔多食完碗麵望下張單先記得，問下店員之後大約5分鐘就有得食啦，呢個餃子普通啦，不過不失。總結黎講，拉麵湯底濃而不膩，而且冇口渴嘅感覺，證明冇落味精。店員都好好禮貌，同埋環境都幾舒服，值得一試嘅。