拉麵來 (已搬遷) 新店位置

唔知點又整到條腰，星期六全日呆在家連靚仔教練都冇見，更加冇去揼骨做facial。經友人提醒，除咗針灸仲可以睇推拿。於是星期日晨早躪起身，打去約以前救過我隻右手同條腰無限次嘅推拿老醫師。既然去旺角又未食早餐，記起早幾晚掃街經過黑布街有拉麵，順便啪咖啡。12點幾去到冇乜人。環境好別緻，扮舊時嘅日本街道、小賣店。見到有期間限定土－魚介末湯，要咗普通濃度，硬麵，加溏心蛋，叫咗唔夠5分鐘就上。飲啖湯，覺得比坊間淡口，濃稠度適中，但魚介味、豬骨味幾平衡，又唔會有過鹹嘅弊端，撈勻葱、蒜蓉、香油就重味番啲。啲麵夠硬身，由於湯底淡，少有食到麵粉香。配菜得木耳，好唔豐富。叉燒有焦香，肥瘦相間幾平均，肥膏爽身，瘦位雖有肉味但唔算腍。溏心蛋有調味，又冇過鹹，帶少少甜，味道係好但熟咗啲。之後飲咗好多水清味蕾，因為要過隔離啪啡試味。