幸子茶屋 (已結業)

今次介紹依於長沙灣嘅小清新小店《幸子茶屋》，小店自成一角，好似鬧市之中嘅一片寧靜樂園。佢地最出名嘅一定要數鍋煮奶茶，每日新鮮製作，茶葉亦都用咗台灣直送嘅茶葉。第二樣主打嘅一定要數手工芋圓同埋芋泥，嚟到嘅朋友一定要試下。芋泥麻糬 $40落左order先知原來加$4可以加配肉鬆，不過唔緊要，同樣好食。切開個麵包就會見到白色嘅軟綿牛奶麻糬，食嗰時煙煙韌韌，仲有拉絲嘅效果。另外值得一讚嘅係佢哋嘅手工芋泥，口感非常綿密，中間唔會有粒狀，食落亦都香甜。芒椰芋圓甘露$40好抵食嘅Set, 有三色手工芋圓、芒果肉、西米、柚子、椰漿。三色芋圓包含三種口味，原味芋圓、紫薯圓、番薯圓，仲要有兔仔圖案，好得意。我自己就最鍾意紫薯圓，味道香甜，口感Q彈。另外依款甜品味道酸酸甜甜，又有西米係入面，好啱鍾意有嘢咬下嘅朋友。芋泥鮮奶小芋圓 $36同樣用左手工製芋圓，所以特別Q彈煙韌。綿密嘅芋泥同鮮奶其實好夾，飲落去又幼滑。